ᐃᑉᐱᓐᓂᐊᓃᑦ

ᐃᑉᐱᓐᓂᐊᓃᑦ

ᐃᑉᐱᓐᓂᐊᓂᒃᑯᑦ ᐊᑲᐅᙱᓕᐅᕈᑎᖃᓲᑦ ᐃᓄᐃᑦ ᐅᑭᐅᖏᑦ ᖃᑦᑎᐅᒐᓗᐊᕈᑎᑦ − ᓱᕈᓯᕐᓄᑦ, ᒪᒃᑯᑦᑐᓄᑦ, ᐃᓐᓇᕐᓄᑦ ᐊᒻᒪᓗ ᐃᓐᓴᑐᖃᕐᓄᑦ. ᐃᓄᐃᑦ ᐊᓯᖏᑕ ᐃᑉᐱᓐᓂᐊᓂᖏᑦ ᐱᐅᒍᓐᓃᑎᓪᓗᒋᑦ ᖃᐅᔨᓲᑦ ᑭᓯᐊᓂᓕ ᓇᒻᒥᓂᖅ ᐃᑉᐱᓐᓂᐊᓂᖏᓐᓂᑦ ᐃᒃᓯᖕᓇᐃᑐᐃᓐᓇᓲᑦ. ᖃᓄᐃᓕᐅᕆᐊᒃᓴᖅ ᓇᓗᒍᓐᓇᕋᑦᑕ ᓂᙵᐅᒪᓕᕋᐃᒐᑦᑕ, ᓄᒫᓱᓕᕋᐃᒐᑦᑕ, ᐃᓄᑑᙳᖅᑎᓪᓗᑕ, ᐊᒃᓱᕈᕐᓇᖅᑐᒃᑰᖅᑎᓪᓗᑕ ᐅᕝᕙᓘᓐᓃᑦ ᐃᒻᒥᓃᕈᒪᑎᓪᓗᑕ. ᑭᓯᐊᓂᓕ ᖃᓄᐃᓕᐅᕈᑎᒋᔭᐅᔪᓐᓇᖅᑐᓕᒫᖑᕗᑦ, ᐊᒻᒪᓗ ᐃᓄᑦᑕᖃᕐᓂᖅᓴᐅᑐᐃᓐᓇᖅᑐᖅ ᐃᑲᔪᕈᓐᓇᖅᑐᒥᒃ.

ᐃᑉᐱᓐᓂᐊᓂᒃᑯᑦ ᐊᑲᐅᙱᓕᐅᕈᑎᖃᓲᑦ ᐃᓄᐃᑦ ᐅᑭᐅᖏᑦ ᖃᑦᑎᐅᒐᓗᐊᕈᑎᑦ − ᓱᕈᓯᕐᓄᑦ, ᒪᒃᑯᑦᑐᓄᑦ, ᐃᓐᓇᕐᓄᑦ ᐊᒻᒪᓗ ᐃᓐᓴᑐᖃᕐᓄᑦ.  ᐃᓄᐃᑦ ᐊᓯᖏᑕ ᐃᑉᐱᓐᓂᐊᓂᖏᑦ ᐱᐅᒍᓐᓃᑎᓪᓗᒋᑦ ᖃᐅᔨᓲᑦ ᑭᓯᐊᓂᓕ ᓇᒻᒥᓂᖅ ᐃᑉᐱᓐᓂᐊᓂᖏᓐᓂᑦ ᐃᒃᓯᖕᓇᐃᑐᐃᓐᓇᓲᑦ.  ᖃᓄᐃᓕᐅᕆᐊᒃᓴᖅ ᓇᓗᒍᓐᓇᕋᑦᑕ ᓂᙵᐅᒪᓕᕋᐃᒐᑦᑕ, ᓄᒫᓱᓕᕋᐃᒐᑦᑕ, ᐃᓄᑑᙳᖅᑎᓪᓗᑕ, ᐊᒃᓱᕈᕐᓇᖅᑐᒃᑰᖅᑎᓪᓗᑕ ᐅᕝᕙᓘᓐᓃᑦ ᐃᒻᒥᓃᕈᒪᑎᓪᓗᑕ.  ᑭᓯᐊᓂᓕ ᖃᓄᐃᓕᐅᕈᑎᒋᔭᐅᔪᓐᓇᖅᑐᓕᒫᖑᕗᑦ, ᐊᒻᒪᓗ ᐃᓄᑦᑕᖃᕐᓂᖅᓴᐅᑐᐃᓐᓇᖅᑐᖅ ᐃᑲᔪᕈᓐᓇᖅᑐᒥᒃ.


ᓱᕈᓰᑦ: ᐃᓚᖏᑦ ᓱᕈᓰᑦ ᐅᖃᐅᓯᖃᓲᑦ ᐃᑉᐱᓐᓂᐊᓂᖏᓐᓂᑦ.  ᐊᓯᖏᑦ ᓱᕈᓰᑦ ᕿᓄᖓᔭᒍᓐᓇᖅᑐᑦ ᐊᒻᒪᓗ ᐅᖃᐅᓯᖃᙱᓪᓗᑎᑦ ᐃᑉᐱᓐᓂᐊᓂᖏᓐᓂᑦ ᐅᕝᕙᓘᓐᓃᑦ ᐃᓕᖅᑯᓯᖅᓱᑲᒻᒪᓕᖅᑐᑎᑦ.  ᓱᕈᓯᖅ ᖁᕕᐊᓱᙱᑦᑎᓪᓗᒍ ᐊᑯᓂᐅᓗᐊᙱᑦᑐᖅ, ᖃᐅᑕᒫᓪᓗ ᐃᓅᓯᖏᓐᓂᒃ ᖃᓄᐃᒃᓴᖅᑑᔮᖃᑦᑕᙱᑦᑐᑎᑦ, ᐃᓱᒫᓗᓇᖅᑐᖅᑕᖃᖅᑐᒃᓴᐅᙱᓚᖅ.  ᑭᓯᐊᓂᓕ ᐃᑉᐱᓐᓂᐊᓂᒃᑯᑦ ᐊᑲᐅᙱᓕᐅᕈᑏᑦ ᓴᖅᑭᕋᐃᒻᒪᑕ, ᖃᓄᐃᓕᐅᖅᑕᐅᙱᑦᑎᓪᓗᒋᓪᓗ, ᐱᐅᙱᑐᒻᒪᕆᒻᒥᒃ ᐃᓱᒪᒃᑯᑦ ᐃᑉᐱᓐᓂᐊᓂᒃᑯᓪᓗ ᐊᑲᐅᙱᓕᐅᕈᑎᓂᑦ ᓴᖅᑮᒍᓐᓇᕐᒪᑕ.  ᓱᕈᓰᑦ ᒪᒃᑯᑦᑐᓪᓗ ᐃᑉᐱᓐᓂᐊᓕᖅᓴᕋᐃᒻᒪᑕ ᖃᓄᐃᓕᐅᖅᑐᖃᖅᑎᓪᓗᒍ ᐊᒻᒪᓗ, ᐃᑲᔪᖅᓱᖅᑕᐅᑦᑎᐊᙱᑦᑎᓪᓗᒋᑦ, ᐊᒃᓱᕈᓕᕈᓐᓇᖅᑐᑦ, ᓄᒫᓱᓕᕐᓗᑎᑦ ᐊᒻᒪᓗ ᖁᕕᐊᓱᙱᑦᑐᕐᔪᐊᒻᒪᕆᐅᓕᕐᓗᑎᑦ.

ᒪᒃᑯᑦᑐᑦ:  ᒪᒃᑯᑦᑐᓕᒫᑦ ᐃᓅᓯᕆᔭᖏᑦ ᐱᐅᔪᒃᑯᑦ ᐃᑉᐱᓐᓂᐊᓂᒃᑯᑦ ᐊᑐᐃᓐᓇᕆᐊᖃᕋᓗᐊᖅᑕᖏᑦ.  ᐊᑲᐅᙱᓕᐅᕈᑎᐅᒻᒥᔪᕐᓕ ᓱᕈᓰᑦ ᐊᖏᓪᓕᕙᓪᓕᐊᑎᓪᓗᒋᑦ ᐃᒻᒥᓂᒃ ᐱᓕᕆᔪᓐᓇᓗᐊᕌᓗᒍᓐᓇᖅᑐᒋᒍᓐᓃᓲᖑᒻᒪᑕ.  ᖃᓄᐃᓕᐅᖁᔭᐅᓲᖑᒻᒪᑕ ᓱᕈᓰᑦ ᐱᓕᕆᐊᒃᓴᖃᙱᓐᓂᖅᓴᐅᓲᖑᓪᓗᑎᑦ.  ᐃᓕᓐᓂᐊᕐᕕᒻᒥ ᐊᑲᐅᙱᓕᐅᕈᑏᑦ ᐊᑦᑐᐃᓂᖃᕈᓐᓇᖅᑐᑦ ᐃᑉᐱᓐᓂᐊᓂᖏᓐᓂ.  ᐱᕋᔭᒃᑕᐅᓗᐊᖃᑦᑕᖅᑐᑦ ᐃᓕᓴᕕᒻᒥ ᐃᑭᐊᖅᑭᕕᒃᑯᓪᓘᓐᓃᑦ ᐱᒻᒪᕆᐊᓗᒃᑯᑦ ᐊᑲᐅᙱᓕᐅᕈᑎᐅᕗᑦ ᐊᑦᑐᐃᓂᖃᕈᓐᓇᖅᑐᑎᑦ ᐃᑉᐱᓐᓂᐊᓂᖏᓐᓂᑦ.  ᐱᖃᓐᓈᖃᖅᑎᓪᓗᒋᑦ ᐱᕋᔭᖃᑦᑕᑎᓪᓗᒋᑦ ᒪᒃᑯᑦᑐᑦ ᐃᓅᓯᖓ ᐃᓱᓕᑦᑎᑦᑑᔮᓲᖒᔪᖅ ᒪᒃᑯᑦᑑᓪᓗᓂ.  ᒪᒃᑯᑦᑐᑦ ᐱᖃᑎᖃᑦᑎᐊᕈᓐᓇᖅᑐᑦ ᐊᖓᔪᖅᑳᖏᓐᓂᑦ ᐃᑉᐱᓐᓂᐊᓂᖏᑎᒍᑦ ᐱᐅᓂᖅᓴᐅᖃᑦᑕᓲᑦ.  ᐱᒻᒪᕆᐅᕗᖅ ᐊᖓᔪᖅᑳᕆᔭᐅᔪᑦ ᐅᖃᖃᑎᖃᖃᑦᑕᕈᑎᑦ ᕿᑐᕐᖓᖏᑕ ᐃᓅᓯᖏᑦ ᖃᓄᐃᓐᓂᖏᓐᓂᑦ ᐊᒻᒪᓗ ᑭᓱᑦ ᐱᒻᒪᕆᐅᓇᓱᒋᔭᐅᒻᒪᖔᑕ ᖃᐅᔨᓇᓱᖃᑦᑕᕐᓗᑎᑦ. 

ᐃᓐᓇᐃᑦ: ᐊᒥᓱᑦ ᐃᓐᓇᐃᑦ ᐃᖅᑲᓇᐃᔮᒥᓄᑦ, ᐊᓯᖏᓪᓗ ᐃᓐᓇᐅᖃᑎᖏᓐᓄᑦ ᖃᑕᙳᑎᖏᓐᓄᓪᓗ ᐃᓅᓯᖏᑦ ᐊᒃᓱᕈᓕᓲᑦ.  ᐊᖏᕐᕋᒥ, ᐃᖅᑲᓇᐃᔮᕐᒥ ᐸᖅᑭᔭᕆᐊᓖᓪᓗ ᖃᑕᙳᑎᖏᑦ ᐊᒻᒪᓗ ᕿᑐᕐᖓᖏᑦ ᐊᑲᐅᙱᓕᐅᕈᑎᑕᖃᓕᖅᑎᓪᓗᒍ ᐱᔭᒃᓴᖃᓗᐊᖅᑐᐊᓘᔮᓕᓲᑦ.  ᐊᒃᓱᕈᕐᓇᕐᒪᑦ ᐊᐅᓚᑦᑎᒍᓐᓇᕋᓱᒋᓗᓂ ᐅᕝᕙᓘᓐᓃᑦ ᑕᒪᒃᑯᐊ ᑲᒪᒋᕆᐊᖃᖅᑐᒋᓗᐊᕌᓗᒋᓪᓗᒋᑦ ᐅᖁᒪᐃᓪᓕᓇᕐᒪᑕ. 

ᐊᒥᓱᑦ ᐊᑲᐅᙱᓕᐅᕈᑎᐅᔪᑦ ᓴᖅᑭᓲᑦ ᐊᓂᒍᓲᓪᓗ.  ᑭᓯᐊᓂᓕ ᐊᑲᐅᙱᓕᐅᕈᑏᑦ ᑲᔪᓯᑐᐃᓐᓇᓕᖅᑎᓪᓗᒋᑦ ᐃᑉᐱᓐᓂᐊᓂᑦᑎᓐᓂᑦ ᐅᕙᑦᑎᓐᓄᑦ ᐊᑦᑐᐃᓂᖃᓲᑦ ᑕᐃᒪᐃᑦᑎᓪᓗᒋᑦ ᐃᑲᔪᖅᑕᐅᔭᕆᐊᖃᓕᖅᑐᒍᑦ.  ᓄᒫᓱᒃᑐᓂ, ᐊᒃᓱᕈᐃᓐᓇᓗᐊᖅᑐᓂ ᖃᖓᓕᒫᒃᑯᑦ ᐃᒻᒥᓃᕈᒪᓕᖅᑐᓂ ᐊᑐᖅᑕᐅᖏᓐᓇᓲᖑᙱᒻᒪᑕ ᐃᓄᓐᓄᑦ.

ᐊᑲᐅᙱᓕᐅᕈᑏᓪᓗ ᐃᒥᖃᑦᑕᖅᑐᓄᑦ ᐋᙵᔮᕐᓇᖅᑐᑐᓲᓄᑦ ᓴᖅᑭᓲᑦ.  ᐊᑕᐅᓯᖅ ᐃᓄᒃ ᑕᒪᐃᓐᓂᑦ ᑎᓴᒪᓂᑦ ᐃᓱᒪᒃᑯᑦ ᐊᒃᓱᕈᕈᑎᖃᓲᑦ ᐃᓅᓯᖏᓐᓂᑦ.  ᐊᑕᐅᓯᖅ ᐃᓄᒃ ᑕᒪᐃᓐᓂᑦ ᖁᓕᓂᑦ ᐃᒥᓗᐊᖃᑦᑕᓕᓲᖅ ᐋᙵᔮᕐᓇᖅᑐᑐᕐᓗᓂᓘᓐᓃᑦ.  ᐃᓄᑑᑎᑦᑕᕆᐊᖃᙱᓚᑎᑦ ᑕᒪᒃᑯᐊ.  ᐃᑲᔪᖅᑕᐅᔪᓐᓇᕋᕕᑦ.  ᑭᓱᓕᒫᑲᓴᐃᑦ ᑲᒪᒋᔭᐅᔪᓐᓇᕐᒪᑕ.