ᓂᕆᑦᑎᐊᖃᑦᑕᕐᓂᖅ

ᓂᕆᑦᑎᐊᖃᑦᑕᕐᓂᖅ

ᖃᐅᑕᒫᑦ ᐃᓱᒪᓕᐅᓲᖒᕗᒍᑦ ᖃᓄᐃᑦᑐᓂᑦ ᓂᕆᓂᐊᕐᒪᖔᑦᑕ.  ᑖᒃᑯᐊ ᐃᓱᒪᓕᐅᕐᓂᕗᑦ ᐊᑦᑐᐃᓂᖃᕕᔾᔪᐊᖅᑐᑦ ᐋᓐᓂᐊᖅᑕᐃᓕᓂᑦᑎᓐᓄᑦ ᐊᒻᒪᓗ ᐃᑉᐱᓐᓂᐊᓂᑦᑎᓐᓄᑦ − ᒫᓐᓇᐅᔪᖅ ᓯᕗᓂᒃᓴᑦᑎᓐᓄᓪᓗ.

ᓂᕆᑦᑎᐊᖃᑦᑕᕐᓂᖅ ᐋᓐᓂᐊᖅᑕᐃᓕᒍᑎᒻᒪᕆᐅᕗᖅ.  ᐃᓕᓐᓂᐊᒃᑲᓐᓂᕐᓗᓂ ᓂᕆᑦᑎᐊᖃᑦᑕᓂᕐᒥᒃ ᐃᑲᔪᖅᐳᖅ ᐃᓕᓐᓂᒃ ᖃᑕᙳᑎᓐᓂᓪᓗ ᖃᓄᑎᒋᑦ ᓂᕆᔪᒃᓴᐅᒻᒪᖔᔅᓯ ᐊᖏᑎᒋᔭᖏᓐᓂᑦ.  ᖃᓄᐃᑦᑑᕙᑦ ᓂᖀᑦ ᐃᓕᓐᓄᑦ ᐱᐅᓛᖑᔪᑦ ᐊᒻᒪᓗ ᐊᔾᔨᒌᙱᑦᑐᓂᑦ ᓂᕆᒋᐊᖃᖅᑐᑎᑦ ᓲᕐᓗ ᓂᕿᓪᓚᑦᑖᑦ ᓂᕐᔪᑎᓃᙶᖓᔪᓂᑦ ᐊᒻᒪᓗ ᓂᐅᕕᕐᕕᓃᙶᖅᑐᓂᑦ.
 

ᑭᓲᒻᒪᑦ ᓂᕆᑦᑎᐊᖃᑦᑕᕐᓂᖅ?

ᓂᕆᑦᑎᐊᖃᑦᑕᓲᖑᕗᑦ ᐃᓄᐃᑦ ᓂᕆᖃᑦᑕᕋᐃᒻᒪᑕ ᓂᕿᓪᓚᑦᑖᓂᑦ ᐊᒻᒪᓗ ᓂᐅᕕᕐᕕᓐᓃᙶᖅᑐᓂᑦ.  ᓂᐅᕕᕐᕕᒻᒦᙶᖅᑐᓂᑦ ᓂᕿᖃᖅᑐᓂ, ᓂᕈᐊᖃᑦᑕᖅᑐᓂ ᓂᕿᓂᒃ ᑎᓴᒪᓂᒃ ᐊᕕᑦᑐᖅᑕᐅᓯᒪᔪᓂᒃ ᓂᕆᖃᑦᑕᖁᔭᐅᔪᓂᒃ ᓂᕆᕙᒃᑯᕕᑦ ᐱᐅᓛᖑᕗᖅ: ᐱᕈᖅᑐᒥᓃᑦ, ᓰᕐᓇᖅᑐᑦ ᐱᕈᖅᑐᒥᓃᑦ, ᐱᕈᖅᑕᐅᓲᑦ ᓲᕐᓗ ᓂᐊᖅᑲᐅᔭᓕᐊᕆᔭᒃᓴᑦ, ᐃᒻᒧᓂᑦ ᐊᒻᒪᓗ ᐃᒻᒧᓕᓐᓂᒃ, ᐊᒻᒪᓗ ᓂᕿᑐᐃᓐᓇᕐᓂᒃ ᓂᕿᑐᐃᓐᓇᓕᓐᓂᓪᓗ.  ᓂᖀᑦ ᑕᕝᕙᓃᒃᑲᔭᙱᑦᑐᑦ ᓂᕿᓂᒃ ᑎᓴᒪᐃᓕᖅᑲᖓᑎᑕᐅᔪᓂᒃ ᐊᔾᔨᒌᙱᑦᑐᒡᒍᑕᐃᑦ ᓲᕐᓗ ᐅᑯᐊᖑᕗᑦ ᐃᒥᒐᖅ, ᐸᑏᑎ, ᐊᒻᒪᓗ ᐅᖁᒻᒥᐊᒐᑦ ᑖᒃᑯᐊ ᓂᕿᑦᑎᐊᕙᐅᙱᒻᒪᑕ.
 

ᐊᔾᔨᒋᙱᒻᒥᔭᖏᓐᓂ ᓂᐅᕕᕐᕕᓃᙶᖓᙱᑦᑐᑦ ᓂᖀᑦ, ᓂᕐᔪᑎᓃᙶᖅᑐᑦ ᓂᕿᓕᒫᑦ ᓂᕿᑦᑎᐊᕙᐃᓐᓇᐅᕗᑦ ᐊᒻᒪᓗ ᓂᕿᑐᐃᓐᓇᖅᑐᖃᑦᑕᖅᑐᓂ ᓂᕆᑦᑎᐊᕐᓂᐅᕗᖅ.

ᓂᕿᑐᐃᓐᓇᐃᑦ ᓂᕿᕐᔪᑎᓃᙶᖅᑐᑦ ᑎᓴᒪᐃᓕᖅᑲᖓᑎᑕᐅᔪᓄᑦ ᓂᕿᑦᑎᐊᕙᐅᓂᕋᖅᑕᐅᔪᓅᖓᙱᑦᑐᑦ.  ᐊᔾᔨᒌᙱᑦᑐᓂᑦ ᓂᕿᔪᕐᓃᙶᖅᑐᑦ ᓂᕿᓕᒫᖏᑦ ᓂᕆᔭᐅᔭᕋᐃᒻᒪᑕ, ᑎᒥᓕᒫᕗᑦ ᐱᔭᕆᐊᖃᖅᑕᖏᓐᓂᒃ ᐊᑐᓲᖑᒌᖅᑐᑦ. 

ᐊᖏᑎᒋᔪᑦ ᓂᕆᒋᐊᓕᑦᑎᑦ ᑐᙵᕕᖃᖅᑐᑦ ᐅᑭᐅᕐᓂᑦ, ᐊᖏᑎᒋᓂᕕᑦ, ᐃᖃᐃᓕᓴᖃᑦᑕᕐᓂᕕᑦ, ᐊᖑᑕᐅᒍᕕᓪᓘᓐᓃᑦ ᐊᕐᓇᐅᒍᕕᓪᓘᓐᓃᑦ ᐊᒻᒪᓗ ᓯᖓᐃᒍᕕᑦ ᐊᒫᒪᑦᑎᑦᑎᒍᕕᓪᓘᓐᓃᑦ.  ᖃᑕᙳᑎᖃᕈᕕᑦ ᐱᐊᕋᖃᕐᓗᑎᑦ, ᓱᕈᓯᖃᕐᓗᑎᑦ, ᐅᕝᕙᓘᓐᓃᑦ ᐃᒡᓗᒥᐅᑕᖃᑎᖃᕈᕕᑦ ᐃᓐᓇᑐᖃᕐᒥᒃ ᐸᕐᓇᖃᑦᑕᕆᐊᖃᖅᐳᑎᑦ ᖃᐅᔨᒪᑦᑎᐊᕐᓗᑎᑦ ᐊᔾᔨᒌᙱᑦᑐᓂᑦ ᓂᕆᖃᑦᑕᕐᓂᐊᕋᓗᐊᕐᒪᖔᑕ ᖃᐅᑕᒫᑦ ᖃᓄᐃᑦᑕᐃᓕᖁᓪᓗᒋᑦ.

ᓂᕆᑦᑎᐊᖃᑦᑕᕈᔅᓯ ᖃᑕᙳᑎᑎᓪᓗ, ᐊᐅᓚᒍᓐᓇᕐᓂᖅᓴᐅᒐᔭᖅᑐᓯ, ᐊᑲᐅᑦᑎᐊᖃᑦᑕᕐᓗᓯ, ᐊᒻᒪᓗ ᐋᓐᓂᐊᖅᑕᐃᓕᓗᓯ.  ᓂᕆᑦᑎᐊᖃᑦᑕᖅᑐᓂ ᐃᒪᐃᑦᑐᑖᕐᓇᙱᓐᓂᖅᓴᐅᕗᖅ ᐋᓐᓂᐊᓂᑦ:

  • ᐆᒻᒪᑎᕐᓗᓐᓂᖅ
  • ᖃᕋᓴᒃᑯᑦ ᖄᖅᑐᖃᕐᓂᖅ
  • ᐊᐅᒃ ᓱᑲᖃᓗᐊᖅᑐᖅ
  • ᑳᓐᓱ
  • ᐊᐅᑉ ᓯᖑᔭᓐᓂᖓ ᖁᕝᕙᓯᓗᐊᖅᑐᖅ
  • ᓴᐅᓂᕐᓗᓐᓂᖅ

 

ᐅᑯᐊ ᑕᕝᕙ ᐊᑐᕈᓐᓇᖅᑕᑎᑦ ᓂᕆᑦᑎᐊᖃᑦᑕᖁᓪᓗᑎᑦ:

  • ᐊᑐᕐᓗᒍ ᓄᓇᕘᒥ ᓂᕿᑦᑎᐊᕙᑦ ᐊᑐᐊᕋᒃᓴᑦ ᓂᕈᐊᑦᑎᐊᖃᑦᑕᕐᓂᐊᕋᕕᑦ ᓂᕿᑦᑎᐊᕙᓂᒃ ᖃᐅᑕᒫᑦ.
  • ᓂᕐᔪᑎᓃᙶᖅᑐᓂᑦ ᓂᕆᖃᑦᑕᕐᓗᑎᑦ ᓂᕆᔪᒪᓕᕋᐃᒍᕕᑦ.
  • ᓄᑖᕐᓂᑦ, ᖁᐊᖅᑎᑕᐅᓯᒪᔪᓂᒃ ᖃᑦᑖᕐᔪᓛᕐᓃᑦᑐᓂᑦ ᐱᕈᖅᑐᓂᑦ ᓰᕐᓇᖅᑐᓂᓪᓗ ᐱᕈᖅᑐᒥᓂᕐᓂᑦ ᓂᕆᖃᑦᑕᕐᓗᑎᑦ ᖃᐅᑕᒫᑦ.
  • ᐊᐅᓚᔪᓐᓇᐅᑎᖃᑦᑎᐊᖁᓪᓗᑎᑦ, ᓂᕆᖃᑦᑕᕐᓗᑎᑦ ᐱᕈᖅᑐᒥᓂᕐᓂᑦ ᓲᕐᓗ ᓂᐊᖅᑲᐅᔭᓕᐊᕆᔭᐅᓲᕐᓂᑦ, ᐊᕿᑦᑐᔮᑦ, ᑲᔪᖅ ᓂᐊᖅᑲᐅᔭᖅ, ᐅᓪᓛᖅᓯᐅᑏᑦ ᓱᑲᖃᙱᑦᑐᑦ
  • ᐃᒥᑐᐃᓐᓇᕐᒥᒃ ᐃᒥᖃᑦᑕᓂᖅᓴᐅᓗᑎᑦ
  • ᐃᒥᒐᒃᓴᓕᐊᕆᔭᐅᓯᒪᔪᑦ ᓱᑲᖃᓗᐊᕐᒪᑕ ᓲᕐᓗ ᐃᒥᒐᑦ, ᐃᕿᐊᓱᔾᔭᐃᒃᑯᑦ, ᑏ ᓂᓪᓕᓇᖅᑐᑦ, ᐊᓂᐅᑦ ᓱᑲᓖᑦ, ᐃᒥᒐᒃᓴᑦ ᐃᒥᒐᒃᓴᑦ ᐃᒥᕐᒧᑦ ᐃᓚᔭᐅᓲᑦ ᑕᒪᒃᑯᐊᓗ ᐱᔭᐅᓗᐊᖃᑦᑕᕆᐊᖃᙱᓚᑦ.
  • ᐅᖅᓱᖃᓗᐊᙱᑦᑐᒥᒃ ᐃᒻᒧᑦᑐᖃᑦᑕᕐᓗᑎᑦ, ᔫᒍᑦ, ᓰᓯ ᐅᕝᕙᓘᓐᓃᑦ ᐱᕈᖅᑐᒥᓂᕐᒦᙶᖓᔪᖅ ᐃᒻᒧᓕᐊᕆᔭᐅᓯᒪᔪᓂᑦ ᖃᐅᑕᒫᑦ ᓴᐅᓂᑎᑦ ᓴᙱᔫᓂᐊᕐᒪᑕ.
  • ᖃᑦᑖᕐᔪᓛᕐᒦᑦᑐᑦ ᐃᖃᓗᑦ ᐊᔾᔨᒌᙱᑦᑐᑦ, ᐅᕕᓗᒃ, ᐊᒻᒪᓗ ᐅᓱᑦ ᓂᕿᑦᑎᐊᕙᐅᓂᖅᓴᐅᕗᑦ ᐅᑯᐊᓕ ᐱᐅᙱᓂᖅᓴᐅᓪᓗᑎᑦ ᖃᑦᑖᕐᔪᓛᕐᒦᑦᑐᑦ ᓂᖀᑦ ᓲᕐᓗ ᐃᒻᒧᒃᓯᐅᒐᒥᓃᑦ ᐊᒻᒪᓗ ᑭᓕᒃ.
  • ᒪᓐᓃᑦ, ᒪᑕᕐᓘᑦ ᐊᒻᒪᓗ ᖃᑦᑖᕐᔪᓛᕐᒦᑦᑐᑦ ᓂᓕᕐᓇᑦ ᓂᕿᑦᑎᐊᕙᐅᕗᑦ, ᓴᓇᔭᕆᐊᑭᑦᑐᑎᑦ, ᐊᒻᒪᓗ ᐊᑭᑭᓐᓂᖅᓴᐅᓪᓗᑎᑦ ᐊᓯᖏᓐᓂᒃ ᐆᓇᖅᓯᑐᐃᓐᓇᕆᐊᓕᓐᓂᑦ ᓂᕿᓂᑦ.

 

ᓂᕿᑦᑎᐊᕙᓂᒃ ᓂᕆᖃᑦᑕᕐᓗᓂ, ᓈᒻᒪᑦᑐᓂᓪᓗ ᓂᕆᖃᑦᑕᕐᓗᓂ ᐊᔾᔨᒌᙱᑦᑐᒡᒍᑕᓂᒃ ᓇᓗᓇᐃᒃᑯᑕᕐᓃᑦᑐᓂᑦ ᖃᐅᑕᒫᑦ.

ᐱᕈᖅᑐᒥᓃᑦ ᐊᒻᒪᓗ ᓰᕐᓇᖅᑐᑦ ᐱᕈᖅᑐᒥᓃᑦ

ᓂᕆᓂᖅᓴᐅᖃᑦᑕᕆᐊᖃᖅᑐᒍᑦ ᑖᒃᑯᓇᙵᑦ ᐅᓪᓗᖅ ᐊᓂᒍᖅᐸᓪᓕᐊᑎᓪᓗᒍᑖᒃᑯᐊ ᓂᖀᑦ ᓂᕿᑦᑎᐊᕙᐅᕗᑦ ᐅᑯᐊ ᐱᔾᔪᑎᒋᓪᓗᒋᑦ:

  • ᐱᕈᖅᑐᒥᓂᕐᓃᑦᑐᑦ ᑎᒥᒧᑦ ᐱᐅᔪᒡᒍᑕᐅᒻᒪᑕ.  ᑖᒃᑯᐊ ᓂᕿᓂᒃ ᐃᓇᓗᐊᒃᑰᓕᖅᑎᑦᑎᑦᑎᐊᓲᑦ, ᐅᖅᓱᖃᓗᐊᕐᔭᐃᖅᑎᑦᑎᓪᓗᑎᑦ ᐊᒻᒪᓗ ᑳᓐᓱᑖᖅᑕᐃᓕᑎᑦᑎᓲᖑᓪᓗᑎᑦ.
  • ᕙᐃᑎᒪᓐ−ᖃᑦᑎᐊᖅᑐᑎᑦ ᓄᒃᑭᔅᓴᐃᑎᓂᓪᓗ ᑎᒥᑦᑎᓐᓂᒃ ᒪᒥᑎᑦᑎᓲᖑᓪᓗᑎᑦ ᐃᔨᑦᑎᓂᓪᓗ ᐅᕕᓂᑦᑎᓐᓂᓪᓗ ᖃᓄᐃᑦᑕᐃᓕᑎᑦᑎᓲᖑᓪᓗᑎᑦ.  ᐊᓯᖏᑦ ᓇᓗᓇᐃᒃᑯᑕᓃᑦᑐᑦ ᓂᖀᑦ ᑕᐃᒪᐃᑦᑐᖃᐅᑦᑎᐊᙱᒻᒪᑕ.

ᐃᑲᔫᑎᑦ ᐊᑐᕋᒃᓴᑦ:

  • ᓂᕈᐊᖅᓯᖃᑦᑕᕐᓗᑎᑦ ᐱᕈᖅᑐᒥᓂᕐᓂᑦ ᓰᕐᓇᖅᑐᓂᓪᓗ ᑲᒪᒋᔭᐅᓯᒪᔪᑦ ᐅᖅᓱᖃᓗᐊᙱᑦᑐᑎᑦ ᐅᖅᓱᖃᙱᑦᑐᒃᑯᓪᓘᓐᓃᑦ, ᓱᑲᖃᓗᐊᙱᑦᑐᓂᑦ ᑕᕆᐅᕐᒥᓪᓘᓐᓃᑦ.
  • ᐱᕈᖅᑐᒥᓃᑦ ᓱᕐᕋᒃᓯᒪᙱᑦᑎᓪᓗᒋᑦ, ᖁᐊᖅᑎᑕᐅᓯᒪᑎᓪᓗᒋᑦ  ᖃᑦᑖᕐᔪᓛᕐᒨᖅᑲᖅᑕᐅᓯᒪᔪᓪᓗ ᐱᐅᔪᐃᓐᓇᐅᕗᑦ.  ᖃᑦᑖᕐᔪᓛᕐᒦᑦᑐᑦ ᓰᕐᓇᖅᑐᓂᑦ ᐱᓂᐊᕈᕕᑦ, ᐱᖃᑦᑕᕐᓗᑎᑦ ᖃᑦᑖᕐᔪᓛᕐᒨᖅᑕᐅᓯᒪᔪᑦ ᐃᓚᔭᐅᓯᒪᓪᓗᑎᑦ ᐃᒥᕐᒥᒃ ᔫᓯᒥᓪᓘᓐᓃᑦ, ᓱᑲᖃᙱᓐᓂᖅᓴᐅᔪᓂᑦ.
  • ᓰᕐᓇᖅᑐᑦ ᐱᕈᖅᑐᒥᓃᑦ ᓂᕆᔭᐅᓂᖅᓴᐅᔭᕆᐊᓖᑦ ᓂᕆᔭᐅᙱᓐᓂᖅᓴᐅᓗᑎᑦ ᓰᕐᓇᖅᑐᓃᙶᖅᑐᑦ ᐃᒥᖏᓐᓂᒃ ᓴᓇᓯᒪᔪᓂᒃ.
  • ᐱᕈᖅᑐᒥᓃᑦ ᐃᓚᔭᐅᔪᓐᓇᖅᑐᑦ ᓂᕆᔭᐅᓂᐊᖅᑐᓄᑦ ᐊᒥᓱᓄᑦ ᓲᕐᓗ ᐃᒪᐃᑕᐅᒍᓐᓇᖅᑐᑦ:
    • ᐱᕈᖅᑐᒥᓃᑦ ᐸᐸᑦ, ᑯᐊᓐ, ᐃᒃᑯᑎᑦ ᐆᓯᒪᔪᓪᓘᓐᓃᑦ ᐸᑏᑎᑦ ᐃᓚᔭᐅᔪᓐᓇᖅᑐᑦ ᒪᓐᓂᓄᑦ.
    • ᓯᐊᓗᕆ ᒪᑕᕐᓘᑎᓕᖅᑕᐅᔪᓐᓇᖅᑐᑦ ᑕᒧᓗᒃᑕᐅᓗᑎᑦ.
    • ᐸᑏᑏᑦ ᐃᒐᒃᑯᑦ ᐆᑕᐅᓯᒪᓲᕐᓂᑦ ᐱᙱᖔᕐᓗᑎᑦ, ᐃᒐᒃᑯᑦ ᐆᑦᑎᑦᑎᓴᕋᐃᑦᑐᒃᑯᑦ ᐸᑏᑎ ᐆᖔᕐᓗᒍ.
    • ᐊᒡᒍᖅᓯᒪᔪᑦ ᐱᕈᖅᑐᒥᓃᑦ ᐅᖅᓱᓕᒐᓛᓪᓗᒋᑦ ᐃᒐᒃᑯᑦ ᐆᓪᓗᒋᑦ.

 

ᐱᕈᖅᑐᒥᓂᕐᓃᙶᖅᑐᑦ ᓂᐊᖅᑲᐅᔭᓕᐊᕆᔭᐅᓲᓂᑦ ᐊᔾᔨᒌᙱᑦᑐᑦ ᓂᖀᑦ

ᐱᕈᖅᑐᒥᓂᕐᓃᙶᖅᑐᑦ ᓂᐊᖅᑲᐅᔭᓕᐊᕆᔭᐅᓲᓂᑦ ᓂᕆᔭᐅᓚᐅᖅᑎᓪᓗᒋᑦ ᐊᐅᓚᔪᓐᓇᐅᑎᑖᕈᑎᒋᓛᓲᕆᕙᕗᑦ.

  • ᐱᕈᖅᑐᒥᓂᕐᓃᙶᖅᑐᑦ ᓂᐊᖅᑲᐅᔭᓕᐊᕆᔭᐅᓲᓂᑦ ᑎᒥᒧᑦ ᐱᐅᓛᖑᕗᑦ ‘ᓱᕐᕋᒃᑕᐅᓗᐊᕌᓗᒃᓯᒪᙱᑦᑐᑦ’ ᓂᐊᖅᑲᐅᔭᓕᐊᕆᔭᐅᓯᒪᓪᓗᑎᑦ ᑲᔫᓪᓗᑎᑦ, ᑲᔪᑦ ᐃᓇᓗᐊᖑᔭᑦ, ᐊᖏᔪᑦ ᐱᕈᖅᑐᒥᓂᕐᓃᙶᖅᑐᑦ ᓂᐊᖅᑲᐅᔭᓕᐊᕆᔭᐅᓲᓂᑦ ᐅᓪᓛᖅᓯᐅᑎᐅᕙᒃᑐᓪᓗ ᐊᒻᒪᓗ ᑲᔪᑦ ᐊᓛᓯ.
  • ᐱᕈᖅᑐᒥᓂᕐᓃᙶᖅᑐᑦ ᓂᐊᖅᑲᐅᔭᓕᐊᕆᔭᐅᓲᓂᑦ ᓱᕐᕋᒃᑕᐅᓯᒪᙱᑦᑐᑦ ᑲᔫᓪᓗᑎᑦ ᐱᕈᖅᑐᒥᓂᑉ ᓂᕿᖓᓂᒃ ᐱᖃᕐᓂᖅᓴᐅᕗᑦ, ᐊᒥᓱᓂᒃ ᑎᒥᒧᑦ ᐃᑲᔫᑎᖃᖅᑐᑎᑦ, ᓲᕐᓗ ᑳᓐᓱᑖᖅᑕᐃᓕᒍᑎᐅᔪᓐᓇᖅᑐᑎᑦ.
  • ᖃᐅᔨᔪᓐᓇᖅᑐᑎᑦ ᐱᕈᖅᑐᒥᓂᖅ ᐱᕈᖅᑐᒥᓂᕐᓃᙶᖅᑐᑦ ᓂᐊᖅᑲᐅᔭᓕᐊᕆᔭᐅᓲᑦ ᑲᔫᑦᑎᐊᕈᓂ ᓱᕐᕋᒃᑕᐅᓯᒪᙱᑦᑐᖅ ᐅᖃᓕᒫᕐᓗᒋᑦ ᑭᓱᓂᒃ ᐃᓗᓕᖃᕐᒪᖔᑦ ᑎᑎᕋᖅᓯᒪᔪᓂᒃ.  ᐱᕈᖅᑐᒥᓂᕐᓃᙶᖅᑐᑦ ᓂᐊᖅᑲᐅᔭᓕᐊᕆᔭᐅᓲᓂᑦ ᓱᕐᕋᒃᑕᐅᓯᒪᙱᑦᑐᑦ ᑎᑎᕋᖅᓯᒪᓲᑦ “ᐲᖅᓯᕕᐅᓯᒪᙱᑦᑐᑦ” ᐅᕝᕙᓘᓐᓃᑦ “ᐲᖅᓯᕕᐅᓯᒪᙱᑦᑐᑦ ᐱᕈᖅᑐᒥᓂᖅ ᓂᐊᖅᑲᐅᔭᓕᐊᕆᔭᐅᓲᕐᓃᙶᖅᑐᑦ” ᐊᑎᖓ ᑎᑎᖅᓯᒪᓗᓂ ᓇᑭᙶᕐᓂᕐᒪᖔᑦ (ᓲᕐᓗ ᐃᒻᒧᒃᓯᐅᒐᕐᓄᑦ ᓂᕿᒋᔭᐅᓂᖅᓴᐅᔪᑦ ᐃᓄᓐᓄᑦ ᓂᕿᒋᔭᐅᔪᓐᓇᖅᑐᑎᓪᓘᒐᓗᐊᖅ ᐅᕝᕙᓘᓐᓃᑦ ᐊᑕᐅᓯᕐᒥᒃ ᓂᐊᖁᓖᑦ ᐱᕈᖅᑐᒥᓃᑦ ᐸᓚᐅᒑᓕᐊᕆᔭᐅᓲᑦ).

ᐃᑲᔫᑎᑦ ᐊᑐᕋᒃᓴᑦ:

  • ᐅᓪᓛᒃᑯᑦ ᓂᕆᒋᐊᓯᖃᑦᑕᕐᓗᑎᑦ ᐊᕿᑦᑐᔮᕐᒥᒃ, ᐱᕈᖅᑐᒥᓂᕐᓃᙶᖅᑐᑦ ᓂᐊᖅᑲᐅᔭᓕᐊᕆᔭᐅᓲᓂᑦ ᖃᑯᖅᑎᑕᐅᓯᒪᙱᑦᑐᒥᒃ ᐸᓚᐅᒑᖅᑐᕐᓗᑎᑦ ᓂᐊᖅᑲᐅᔭᒥᓪᓘᓐᓃᑦ, ᐅᕝᕙᓘᓐᓃᑦ ᐱᕈᖅᑐᒥᓂᕐᓃᙶᖅᑐᑦ ᓂᐊᖅᑲᐅᔭᓕᐊᕆᔭᐅᓲᓂᑦ ᖃᑯᖅᓯᑎᑕᐅᓯᒪᙱᑦᑑᓗᒋᑦ ᐅᓪᓛᖅᓯᐅᑎᑐᕐᓗᑎᑦ (ᓱᑲᓕᖅᑕᐅᓯᒪᙱᑦᑐᓂᑦ).
  • ᐅᓪᓛᖅᓯᐅᑏᑦ ᑕᒧᐊᒃᓴᓕᐊᕆᔭᐅᓯᒪᔪᑦ ᐊᒻᒪᓗ ᐊᕿᑦᑐᔮᓖᑦ ᑕᒧᐊᒑᑦ ᐊᑲᕐᕆᔮᖅᑐᑦ ᓂᕆᑐᐃᓐᓇᒐᐅᒻᒪᑦ, ᑭᓯᐊᓂᓕ ᓱᑲᖃᕐᓂᖅᓴᐅᓲᑦ ᐊᒻᒪᓗ ᐱᕈᖅᑐᒥᓂᖃᐅᙱᑦᑐᑦ ᓱᑲᖃᙱᑦᑐᓂᑦ ᐅᓪᓛᖅᓯᐅᑎᓂᑦ.
  • ᐃᒐᒃᑯᑦ ᐆᓪᓗᒋᑦ ᐱᕈᖅᑐᒥᓂᕐᓃᙶᖅᑐᑦ ᓂᐊᖅᑲᐅᔭᓕᐊᕆᔭᐅᓲᓂᑦ ᖃᑯᖅᓯᑎᑕᐅᓯᒪᙱᑦᑐᑦ ᐸᓚᐅᒑᑦ.  ᓂᕿᓕᐅᕐᓂᐊᕈᕕᑦ, ᖃᑯᖅᓯᑎᑕᐅᓯᒪᔪᑦ ᐸᓚᐅᒑᕐᒥᒃ ᐊᕝᕙᖓᓂᒃ ᐊᑐᕈᓐᓇᖅᑐᑎᑦ ᐊᒻᒪᓗ ᐊᕝᕙᖓᓂᒃ ᐱᕈᖅᑐᒥᓂᕐᓃᙶᖅᑐᑦ ᓂᐊᖅᑲᐅᔭᓕᐊᕆᔭᐅᓲᓂᑦ ᐸᓚᐅᒑᓕᐊᕆᔭᐅᓲᓂᑦ ᑲᔪᕐᒥᒃ.

ᐃᒻᒧᐃᑦ ᐃᒻᒧᕈᓘᔭᐃᓪᓗ

ᐃᒻᒧᐃᑦ ᐃᒻᒧᕈᓘᔭᐃᓪᓗ ᓴᐅᓂᕐᓄᑦ ᓴᙵᑎᓐᓇᖅᑐᓖᑦ, ᓄᒃᑭᔅᓴᐅᑎᓖᑦ, ᓂᕿᑦᑎᐊᕙᓖᑦ ᐊᒻᒪᓗ ᓄᑭᓄᑦ ᐃᑲᔫᑎᓖᑦᑖᒃᑯᐊ ᑎᒥᒧᑦ ᐊᑐᖅᑕᐅᓲᑦ ᐱᒻᒪᕆᐅᕗᑦ ᑕᒪᐃᓐᓄᑦ ᖃᓄᐃᑦᑕᐃᓕᓂᖓᓄᑦ ᐃᓄᑉ ᐊᒻᒪᓗ ᑭᒍᑎᑦᑎᐊᕆᓐᓇᖅᑐᑎᑦ ᓴᐅᓂᑦᑎᐊᕆᓐᓇᖅᑐᑎᓪᓗ.

  • ᐃᒻᒧᕈᓘᔭᐃᑦ ᑕᕝᕙᓂ ᓂᕆᖃᑦᑕᖁᔭᐅᔪᑦ ᓂᕿᑦᑎᐊᕙᓂ ᐅᖅᓱᖃᓗᐊᙱᑦᑑᓗᒋᑦ ᐱᐅᓛᖑᕗᑦ ᓲᕐᓗ ᐅᖅᓱᖃᕐᓂᖓ 1−ᐳᓴᓐᑎ ᐅᕝᕙᓘᓐᓃᑦ 2−ᐳᓴᓐᑎ.
  • ᐃᒻᒧᒃ ᐸᓂᑲᑉ ᐊᑕᐅᓯᕐᒦᑦᑎᓪᓗᒍ ᐊᖏᑎᒋᓂᖓ ᐊᑭᑭᓐᓂᖅᓴᐅᕗᖅ ᐃᒥᒐᕐᒥᑦ.
  • ᐸᓂᖅᑐᑦ ᐃᒻᒧᒃ ᐊᑭᑭᓐᓂᖅᓴᐅᒋᓪᓗᑎᑦ ᐃᒻᒧᑐᐃᓐᓇᕐᓂᑦ ᐊᒻᒪᓗ ᑖᒃᑯᐊ ᑎᒥᒧᑦ ᐱᐅᓂᖏᑦ ᐊᔾᔨᑐᐃᓐᓇᕆᓪᓗᓂᒋᑦ.

ᐃᑲᔫᑏᑦ ᐊᑐᕋᒃᓴᑦ:

  • ᐃᒻᒧᒃ ᐸᓂᖅᑐᑦ ᐊᑐᖅᑕᐅᒍᓐᓇᖅᑐᑦ ᐸᓚᐅᒐᔾᔨᐅᕐᓗᓂ ᓂᐊᖅᑲᐅᔭᓕᐅᕐᓗᓂᓘᓐᓃᑦ.
  • ᔫᒍᑦ ᓰᓯᓗ ᓂᕆᔭᐅᔪᒪᒃᑲᐅᒋᕗᑦ ᐊᒻᒪᓗ ᑎᒥᒃᑰᕋᓱᑦᑎᓪᓗᒋᑦ ᐱᔭᕆᐊᑭᓐᓂᖅᓴᐅᔪᑦ.
  • ᑯᑯᓖᑦ ᐃᒻᒧᑦ ᐊᒻᒪᓗ ᐊᓯᖏᓐᓂᒃ ᐃᓚᔭᐅᓯᒪᔪᑦ ᐃᒻᒧᓱᓐᓂᑐᐃᓐᓇᕐᓂᐊᙱᒻᒪᑦ ᓱᑲᖃᖅᐳᑦ, ᑕᐃᒪᐃᒻᒪᑦ ᐱᔭᐅᙱᓐᓂᖅᓴᐅᔭᕆᐊᓖᑦ.
  • ᐃᒥᒐᒃᓴᓕᐅᕈᓐᓇᖅᑐᑎᑦ ᐅᖅᓱᖃᓗᐊᙱᑦᑐᒥᒃ ᐃᒻᒧᒻᒥᒃ ᐊᑐᕐᓗᑎᑦ ᔫᒍᑦ−ᒥᓘᓐᓃᑦ ᑖᒃᑯᐊ ᖁᐊᖅᑎᑕᐅᓯᒪᙱᒃᑲᓗᐊᖅᐸᑕ ᖁᐊᖑᒐᓗᐊᖅᐸᑕᓘᓐᓃᑦ ᐊᑐᕋᒃᓴᐅᓪᓗᑎᑦ ᓂᓚᓕᕐᓗᒋᑦ.

ᓂᖀᑦ ᖀᓪᓗ ᐱᐅᓂᖏᓐᓂᒃ ᐊᔾᔨᓖᑦ

ᓂᖀᑦ ᖀᓪᓗ ᐱᐅᓂᖏᓐᓂᒃ ᐊᔾᔨᓖᑦ (ᓂᓕᕐᓇᑦ, ᒪᓐᓃᑦ, ᐱᕈᖅᑐᒥᓂᕐᓃᙶᖅᑐᑦ, ᖃᖅᑯᐊᒐᑦ) ᐃᒥᒧᑦ ᐊᑐᖅᑕᐅᔭᕆᐊᖃᖅᑐᓂᑦ ᐱᐅᔪᓂᑦ ᐃᓗᓕᖃᖅᑐᑦ ᓲᕐᓗ ᐊᐅᑦᑎᐊᕆᓐᓇᖅᑐᑦ ᓄᑭᖃᑦᑎᐊᕐᓇᖅᑐᓪᓗᓄᑭᖃᑦᑎᐊᕐᓇᖅᑐᑦ ᑎᒥᑦᑎᓐᓂᑦ ᐃᑲᔪᖅᑐᑦ ᐃᒪᓐᓇ

  • ᓄᒃᑭᔅᓴᐅᑎᐅᓪᓗᑎᑦ ᐊᒻᒪᓗ ᐊᐅᑦᑎᐊᕆᓐᓇᖅᑐᓂᑦ ᓂᕆᖃᑦᑕᕆᐊᓖᑦ ᐊᐅᑦᑎᐊᕈᖁᓪᓗᒋᑦ ᐃᓄᐃᑦ.
  • ᐅᖅᓱᖏᑦ ᓂᕐᔪᑎᓃᙶᖅᑐᑦ ᐱᐅᔫᑎᓪᓗᒋᑦ, ᐅᖅᓱᓖᑦ ᓂᐅᕕᐊᕆᔭᐅᓲᑦ ᓂᐅᕕᕐᕕᒻᒥ ᐱᐅᙱᓚᑦ ᑎᒥᒧᑦ ᒥᑭᔫᓈᕆᐊᖃᖅᐸᕗᑦ.
  • ᓂᕿᓂᑦ ᓄᒃᑭᔅᓴᐅᑎᓕᓐᓂᑦ ᐊᐅᑦᑎᐊᕆᓐᓇᖅᑐᓂᑦ ᐱᔪᓐᓇᖅᐳᑎᑦ, ᐱᒻᒪᕆᐅᕗᖅ ᐱᖃᑦᑕᕈᕕᑦ ᓄᑖᒃᓴᔭᓂᑦ ᖁᐊᖅᑎᑕᐅᓯᒪᔪᓂᓪᓗ ᐃᓚᐅᕈᑎᖃᙱᑦᑐᓂᑦ ᓂᕐᔪᑎᓃᙶᖅᑑᔮᕐᓗᒋᑦ.  ᓂᖀᑦ ᓲᕐᓗ ᑰᑰᓯᑉ ᐅᖅᓱᖏᑦ, ᐅᓲᔭᑦ, ᐃᑭᐊᕐᒥᓕᕐᒨᑦᑕᐅᓲᑦ ᑕᕆᐅᖃᕕᐅᑎᒻᒪᑕ ᐊᒻᒪᓗ ᐅᖅᓱᖃᓗᐊᖅᑐᑎᑦ ᐱᐅᙱᑦᑐᒥᑦ, ᐊᒻᒪᓗ ᑖᒃᑯᐊ ᓂᕿᐅᒐᓗᐊᑦ ᑎᒥᒧᑦ ᓄᒃᑭᔅᓴᐅᑎᖃᓗᐊᕌᓗᙱᑦᑐᑦ ᐊᐅᑦᑎᐊᕆᓐᓇᖅᑐᖃᓗᐊᕋᑎᓪᓗ.

ᐃᑲᔫᑏᑦ ᐊᑐᕋᒃᓴᑦ:

  • ᓂᖀᑦ ᐸᓚᐅᒑᓕᖅᓱᖅᑕᐅᓯᒪᔪᑦ ᓲᕐᓗ ᐃᖃᓗᒥᓂᐅᒐᓗᐊᑦ ᐊᕿᒡᒋᒥᓃᓪᓗ ᑕᕆᐅᓕᖅᐹᓘᒻᒪᑕ ᐊᒻᒪᓗ ᐅᖅᓱᖏᑦ ᐱᐅᙱᑐᒡᒍᑕᐅᓪᓗᑎᑦ.
  • ᓄᑖᒃᓴᔭᓂᑦ ᖁᐊᖅᑎᑕᐅᓯᒪᔪᓂᓪᓘᓐᓃᑦ ᓂᕿᑖᖃᑦᑕᕆᑦ ᓂᕐᔪᑎᓃᙶᖅᑑᔮᖅᑐᓂᑦ.
  • ᒪᓐᓃᑦ, ᖃᑦᑖᕐᔪᓛᒨᖅᑕᐅᓯᒪᔪᑦ ᐃᖃᓗᒥᓃᑦ ᐊᔾᔨᒌᙱᑦᑐᑦ, ᐊᒻᒪᓗ ᒪᑕᕐᓘᑏᑦ ᐱᐅᔫᕗᑦ, ᐱᔭᐅᔪᒪᒃᑲᐅᓪᓗᑎᑦ ᐊᒻᒪᓗ ᐊᑭᑭᑦᑐᑎᑦ.
  • ᓂᓕᕐᓇᑦ ᓂᕿᑦᑎᐊᕙᐅᕗᑦ ᐃᓚᔭᐅᔪᓐᓇᖅᑐᑎᑦ ᖃᔪᕐᓄᑦ ᐊᒻᒪᓗ ᐆᔪᕐᓄᑦ.

ᐃᑲᔫᑏᑦ ᓂᕈᐊᖅᓯᓗᓂ ᖃᓄᐃᑦᑐᓂᑦ ᐅᖅᓱᓂᑦ ᐊᑐᖃᑦᑕᕐᓂᐊᕐᒪᖔᑦ

ᐅᖅᓱᖏᑦ ᐃᖃᓗᐃᑦ ᐊᒻᒪᓗ ᐳᐃᔩᑦ ᐱᐅᔪᒻᒪᕆᐅᕗᑦ.  ᓄᒃᑭᔅᓴᐅᑎᖃᐅᖅᑐᑦ ᐊᒻᒪᓗ ᓂᖀᑦ ᑎᒥᒃᑰᖃᑦᑕᕐᓂᖏᑦ ᐅᖅᓱᓖᑦ, ᐆᒻᒪᑎᓄᑦ ᐱᐅᔫᓪᓗᑎᑦ.

ᓂᐅᕕᕐᕕᒻᒥ ᓂᐅᕕᐊᕆᔭᐅᓲᑦ ᐅᖅᓱᑦ ᐱᐅᔪᐃᓐᓇᐅᙱᒻᒪᑕ.

  • ᓂᐅᕕᖃᑦᑕᕐᓗᑎᑦ ᐱᕈᖅᑐᒥᓂᕐᓃᙶᖅᑐᓂᑦ ᐅᖅᓱᓂᑦ ᐅᕝᕙᓘᓐᓃᑦ ᑎᓯᓗᐊᙱᑦᑐᓂᑦ ᒪᑕᕐᒥᒃ.
  • ᐊᑐᖅᑕᐃᓕᖃᑦᑕᕐᓗᑎᑦ ᐳᕐᓂᕕᓂᑦ ᑎᓯᔪᓂᓪᓗ ᒪᑕᕐᓂᑦ.

ᓂᖀᑦ ᐱᐅᙱᑦᑐᒡᒍᑕᐅᔪᑦ ᐱᔭᐅᑦᑕᐃᓕᒪᔭᕆᐊᓕᑦ

ᓂᕆᖃᑦᑕᙱᓪᓗᓂ ᓂᕿᓂᒃ ᐅᖅᓱᖃᓗᐊᖅᑐᓂᑦ ᓱᑲᓗᐊᖅᑐᓂᓪᓗ ᐊᒻᒪᓗ ᑎᒥᒧᑦ ᐃᑲᔫᑎᖃᙱᓗᐊᖅᑐᓂᑦ ᐱᐅᓛᖑᕗᖅᐅᑯᐊ ᐆᑦᑑᑎᐅᕗᑦ ᐱᓗᐊᖅᑕᐃᓕᒪᔭᐅᔭᕆᐊᓖᑦ:

  • ᐅᖅᓱᖃᓗᐊᖅᑐᑦ ᓂᖀᑦ ᓲᕐᓗ, ᐅᖅᓱᒨᖅᓯᒪᔪᑦ, ᓂᐊᖅᑲᐅᔭᓄᑦ ᐃᒐᒨᖅᑕᐅᓲᑦ ᐊᔾᔨᒌᙱᑦᑐᒡᒍᑏᑦ, ᓂᐊᖅᑲᐅᔭᕈᓘᔭᐃᑦ ᐊᔾᔨᒌᙱᑦᑐᑦ ᐊᒻᒪᓗ ᐸᓚᐅᒑᑦ ᐅᖅᓱᒨᖅᓯᒪᔪᑦ.
  • ᓱᑲᖃᓗᐊᖅᑐᑦ ᓂᖀᑦ, ᓲᕐᓗ ᐅᓪᓛᖅᓯᐅᑏᑦ ᓱᑲᓕᖅᑕᐅᓯᒪᔪᑦ, ᑲᐃᒃ ᖄᒃᓴᖏᑦ, ᔮ, ᓰᕐᓇᖅᑐᑦ ᓱᑲᑦ ᐃᒥᓖᑦ, ᑯᑯᑦ ᐊᒻᒪᓗ ᑯᑯᓱᓐᓂᑦᑐᑦ ᓂᐊᖅᑲᐅᔭᕐᒨᖅᑕᐅᓲᑦ.
  • ᑕᕆᐅᖃᓗᐊᖅᑐᑦ ᓂᖀᑦ, ᒪᑦᑖᖅᑐᖅᑑᑦ ᐊᒻᒪᓗ ᖃᑦᑖᕐᔪᓛᕐᒦᑦᑐᑦ ᖃᔪᒃᓴᓪᓗ ᐸᓂᖅᑐᑦ.
  • ᐃᒥᒐᒃᓴᑦ, ᐃᒥᒐᑦ ᐊᒻᒪᓗ ᐃᒥᐊᓗᓕᖅᑕᐅᓲᑦ ᐃᒥᒐᒃᓴᑦ.  ᑖᒃᑯᐊ ᓰᕐᓇᖅᑐᓂᑦ ᐱᕈᖅᑐᒥᓂᕐᓃᙶᙱᒻᒪᑕ ᓱᑲᐃᓐᓇᐸᓘᓪᓗᑎᑦ, ᐃᒥᕐᒥᒃ ᐃᓚᔭᐅᓯᒪᔪᑦ, ᐊᒻᒪᓗ ᐊᒥᐊᓕᖅᓯᒪᓪᓗᑎᑦ.  ᐱᖃᑦᑕᕐᓗᒋᑦ ᑕᐃᒃᑯᐊ ᑭᓯᐊᓂ ᐃᒥᒐᒃᓴᑦ ᓂᐱᑎᒐᓖᑦ ᐅᖃᖅᓯᒪᓪᓗᑎᑦ “100% ᐱᕈᖅᑐᒥᓂᕐᒦᙶᖅᑐᖅ ᓰᕐᓇᖅᑐᒥ ᐃᒥᒐᒃᓴᖅ”.